港島西區摩星嶺一帶，一直以來都係豪宅區，居民非富則貴，不過响殖民地時代，呢個地方就有一個幾得人驚嘅地方，就係域多利道扣押中心，俗稱「白屋」。

呢間「白屋」响上世紀五十年代建成，本來係英軍嘅會所，响五十年代末就由當時嘅政治部接管，成為咗域多利道扣押中心。政治部係殖民地時代一個負責收集情報，監視間諜同政治疑犯嘅一個部門，佢哋有特權隨時拉啲政治疑犯返嚟，拘禁甚至拷問，而「白屋」就係一個拘禁同拷問疑犯嘅地方。昔日有唔少左派同親中人士都曾經响度被拘留過，好似漢華中學校長黃建立、工聯會理事長楊光、影星傅奇石慧夫婦二人等左派人士。

到咗八九十年代，香港回歸中國既成事實，港英政府亦响1995年解散政治部，呢幢專拘禁政治疑犯嘅「白屋」亦被空置，2013年教育局宣佈將「白屋」分配予芝加哥大學布斯商學院發展自資高等院校。